اتجوزته وهو مش لاقي ياكل وبعد ما بقى صاحب ثروة رماني أنا وعيالي واتجوز واحدة من مستواه الجديدأنا اسمي نجلاء عندي خمسة وتلاتين سنة واتجوزت جوزي سامح وأنا عندي عشرين سنة بس وقتها مكنش معاه حاجة خالص غير أوضة صغيرة في بيت أبوه وشوية الهدوم اللي بيشتغل بيهم في ورشة نجارة وكان بيقبض بالعافية اللي يكفينا آخر الشهر ومع ذلك لما اتقدملي حسيت إنه راجل جدع وممكن أبني معاه حياة كويسة حتى لو هنبدأ من
الصفر وأهلي وقتها رفضوا الجوازة وقالولي إن البنت مش بتتجوز عشان تعيش على العيش الحاف بس أنا كنت شايفة فيه حاجة هما مش شايفينها وقلت لهم أنا مش عايزة منه فلوس أنا عايزة راجل يصونني ويقف جنبي ولو هنعيش على الفول والجبنة مش هشتكي طول ما إحنا مع بعض
اتجوزنا في شقة صغيرة بالإيجار وكانت فرحتنا على قدنا وأول كام سنة كانوا صعبين فعلًا سامح كان بيخرج من الفجر ويرجع بالليل وهدومه كلها نشارة خشب وإيده مجروحة من الشغل وفي أيام كتير كنت بعمل الأكل وأستناه لحد ما يرجع عشان ناكل سوا ولو جاب حاجة حلوة في طريقه كان يفرح بيها كأنه جابلي دهب وأنا عمري ما عايرته بقلة الفلوس بالعكس كنت بحاول أوفر من مصروف البيت عشان لو احتاج يشتري عدة جديدة أو
يدفع إيجار الورشة
بعد تلات سنين خلفت ابننا يوسف وبعده بسنتين جت بنتنا مريم وساعتها المسؤولية زادت علينا والإيجار بقى تقيل ومصاريف العيال مش بتخلص وفي مرة صاحب الشقة جه يطالبنا بفلوس متأخرة وكنت واقفة قدامه محرجة ومش عارفة أقول إيه لحد ما سامح رجع من الشغل ولما عرف باللي حصل فضل ساكت طول الليل ولأول مرة أشوفه مكسور بالشكل ده لكنه تاني يوم نزل يدور على شغل إضافي وبدأ ياخد شغل نجارة لحسابه بعد ما يخلص يومه
في الورشة
كنت بساعده على قد ما أقدر أرتب له حسابات الزباين وأراجع معاه الفلوس اللي داخلة واللي خارجة وأوقات كنت أقعد جنبه لحد الفجر وهو بيحسب تكلفة الشغل عشان ما يخسرش وفي يوم جاله طلب كبير لتجهيز شقق في عمارة جديدة وصاحب المشروع عجبه شغله واتفق معاه على شغل مستمر ومن هنا بدأت حياتنا تتغير واحدة واحدة
بعد كام سنة سامح فتح ورشة باسمه وجاب صنايعية يشتغلوا معاه وبعدها استأجر مكان أكبر وبقى يتعامل مع شركات تشطيب ومقاولين ولما كنت أشوفه راجع مبسوط كنت بحس إن تعبي معاه بدأ يجيب نتيجة ولما اشترى لنا شقة تمليك صغيرة عيطت من الفرحة لأنه كان حلمنا من أول يوم اتجوزنا
لكن مع كل خطوة كان بيطلع خطوة أكبر وكل ما فلوسه تزيد كان وقته في البيت يقل وبقى يسافر كتير ويحضر اجتماعات مع ناس عمرنا ما كنا نعرفهم وبدأ يهتم بلبسه وساعته وعربيته ولما كنت أسأله عن سبب التغيير كان يضحك ويقول لي إنه لازم يواكب الناس اللي بيتعامل معاهم
أنا مكنتش ضد نجاحه ولا عمري طلبت منه يفضل فقير عشاني بالعكس كنت أول واحدة بتفرح لما يشتري عربية جديدة أو يفتح مشروع أكبر وكنت بقول للعيال إن أبوهم تعب عشان يوصل للمكانة دي ولازم يفتخروا بيه لكن اللي وجعني إنه بدأ يتعامل معايا كأني بقيت حمل قديم من حياته اللي فاتت
النقاش
التعليقات والردود (0)
سجّل الدخول للمشاركة في النقاش. تسجيل الدخول
لا توجد تعليقات بعد — كن أول من يشارك رأيه.