طول اليوم كنت مرهق من قلة النوم ولما رجعت السكن بالليل افتكرت الزحمة والخناق اللي حصلوا الليلة اللي فاتت. قلت لنفسي إن مهما كان البيت مخيف فهو أرحم من إني أفضل عايش بالشكل ده طول فترة المشروع.
رجعت للبيت بعد العشا وكنت المرة دي مصمم أفهم مصدـ,,ـــر الصوت بدل ما أفضل خايف من حاجة مجهولة. نضفت الأوضة بسرعة وجبت أكل من القرية وبعدها قعدت شوية أراجع رسومات المشروع على الموبايل. كل حاجة كانت هادية لحد ما الساعة قربت من نص الليل وسمعت نفس الصوت جاي من فوق السطح.
المرة دي مسكت الموبايل وشغلت الكشاف وطلعت السلم بحذر. أول ما وصلت السطح سمعت حركة سريعة ناحية مخزن الغلة القديم. لفيت الكشاف ناحية الصوت وشفت قطة بلدي صغيرة بتجري فوق التراب وتقفز على بقايا الخشب. ضحكت على نفسي وقلت إن أنا خوفت يوم كامل بسبب قطة.
حاولت أخوفها عشان تنزل من المكان لكنها جريت ناحية صومعة الغلة القديمة المصنوعة من الطين والقش وكانت متآكلة من أطرافها. قربت منها وأنا بحرك إيدي وبقول لها امشي يا بت من هنا لكنها دخلت في فتحة ضيقة تحت الصومعة واختفت.
حاولت أطلعها بصوتي لكنها ما خرجتش فاضطريت أزيح شوية من بقايا القش والطين اللي كانت واقعة عند الفتحة. وأنا بشد قطعة خشب قديمة علقت في جزء من الصومعة سمعت صوت تكسير مفاجئ واتراجع جسمي لورا وأنا شايف جزء كبير من الطين بينهار على السطح.وقفت مكاني مذهول من اللي حصل وبصيت على الركام اللي وقع قدامي.
كنت هبدأ ألم الطين بعيد عن طريقي لما لمحت حاجة غريبة وسط التراب. حاجة صغيرة بتعكس ضوء الموبايل بشكل مختلف عن الحجارة والخشب حواليها. قربت الكشاف منها وانحنيت على ركبتي وأنا بحاول أشوفها كويس.
مددت إيدي وأزحت طبقة التراب اللي كانت مغطياها ولقيت جزءًا لامعًا بلون غريب ظاهر من تحت بقايا الصومعة. ساعتها نسيت القطة ونسيت خوفي من البيت كله وبقيت مركز في الحاجة اللي ظهرت قدامي وأنا مش قادر أفهم إيه اللي ممكن يكون مدفون تحت مخزن الغلة من كل السنين دي.
الفصل الثاني
فضلت واقف مكاني شوية وأنا بنور على الحاجة اللي ظهرت تحت الركام. في الأول افتكرتها قطعة نحاس قديمة أو جزء من إناء مدفون من أيام جدي لكن لما شلت شوية تراب من حواليها ظهر شكل منحوت بدقة غريبة. كان واضح إن دي مش قطعة من أدوات البيت العادية.
جزء من وجه بشري صغير ظهر وسط التراب ومعاه نقوش دقيقة خلتني أفتكر التماثيل اللي كنت بشوفها في الكتب والصور. رجعت لورا وأنا مش مستوعب اللي قدامي. حاولت أزيح تراب زيادة لكن جزء من الصومعة كان لسه غير ثابت فبطلت فورًا عشان ما ينهارش عليا.
القطة خرجت من ناحية تانية وجريت بعيد وأنا بقيت لوحدي فوق السطح قدام اكتشاف مكنتش أتخيله. نزلت من السطح وجبت كشاف أقوى من شنطتي ورجعت بصيت من بعيد. القطعة كانت باينة بلون ذهبي لكني مكنتش خبير آثار عشان أحكم إذا كانت ذهب فعلًا ولا معدن تاني.
النقاش
التعليقات والردود (0)
سجّل الدخول للمشاركة في النقاش. تسجيل الدخول
لا توجد تعليقات بعد — كن أول من يشارك رأيه.