افتكرت إنه بيهددني عشان أخاف وأروح أعتذر لكن لما لقيته بيتكلم بجد وإنه عايز ينهي الجوازة اتصلت بأمي وأنا بعيط وحكيت لها اللي حصل
أمي طلبت مني أهدى وقالت لي إنها جاية هي وأبويا فورًا ولما وصلوا لقوا أحمد قاعد في الصالة ووشه متغير وحماتي كانت رجعت هي كمان ومعاها أخت أحمد الكبيرة
أبويا حاول يتكلم مع أحمد بهدوء وقال له يا ابني دي أول مشكلة بينكم ومينفعش بيت اتبنى في شهور يتهد في يوم المفروض تقعدوا وتفهموا بعض
أحمد قال له بنت حضرتك غلطت في أمي ومش هقبل أعيش مع واحدة متعرفش الأصول
أبويا بص لي وسألني إنتِ قلتي لها إيه بالضبط فحكيت له كل كلمة حصلت من غير ما أزود حرف
أمي ساعتها مقدرتش تسكت وقالت لحماتي إنتِ لو شايفة إن الفرش مش عاجبك كان ممكن تقولي رأيك بينك وبين نفسك لكن ليه تكسري فرحة بنتي وتقللي من تعبنا قدامها
حماتي ردت عليها وقالت أنا قولت الحقيقة واللي مش عاجبه كلامي مكنش يجيب بنتُه لابني من الأساس
أبويا اتغيرت ملامحه لكنه فضل ساكت شوية وبعدها قال لأحمد لو إنت شايف إن بنتي غلطت يبقى اتحاور معاها لكن إنك تهددها بالطلاق تاني يوم جوازكم فده معناه إنك مش مستعد تتحمل مسؤولية بيت
أحمد رد بسرعة وقال أنا مش هغير رأيي
وقتها أمه قالت له خلاص يا أحمد طالما هي مش عايزة تعتذر يبقى كل واحد يروح لحاله وأنا مش هرضى ابني يعيش في مشاكل كل يوم
كنت مستنية أحمد يعترض أو يقول إننا محتاجين فرصة لكن اللي حصل إنه طلب مني أجمع هدومي لحد ما الموضوع يتحل
أمي دخلت معايا الأوضة وبدأت تحط هدومي في الشنطة وهي بتحاول تمنع دموعها وأبويا كان واقف بره ساكت ومش قادر يبص في عيني
قبل ما أمشي وقفت قدام أحمد وقلت له أنا مش هترجاك تكمل جوازتنا ولا هعتذر عن دفاعي عن أهلي لكن افتكر إنك النهارده مش بتطلق واحدة غلطت في حقك إنت بتتخلى عن واحدة كانت فاكرة إنك هتبقى سندها
مردش عليا وخرجت من الشقة وأنا لابسة نفس الهدوم اللي كنت لابساها من الصبح وشايلة شنطة صغيرة ورايا وأمي ماسكة إيدي كأني طفلة صغيرة
في الطريق للبيت فضلت أعيط وألوم نفسي إني صدقت كل مرة كان بيقولي فيها إنه هيعرف يحافظ على بيته وإنه مش هيسمح لحد يتدخل في حياتنا
لكن أبويا قال لي جملة فضلت فاكرها طول عمري قال لي يا بنتي الجوازة اللي تقع عشان كلمة حق كانت هتتعبك لو كملت لأن اللي بيقبل الإهانة من أهله النهارده ويسيب مراته لوحدها بكرة ممكن يسيبها في حاجات أصعب بكتير
الفصل الثالث
الأيام اللي بعد كده كانت أصعب من إني أوصفها كنت بصحى من النوم وأنسى للحظة إني رجعت بيت أبويا وبعدها أفتكر إني اتجوزت وطلقت في يومين تقريبًا وكنت بحس بوجع في صدـ,,ـــري كل ما أتخيل إن الناس هتسألني عن اللي حصل
النقاش
التعليقات والردود (0)
سجّل الدخول للمشاركة في النقاش. تسجيل الدخول
لا توجد تعليقات بعد — كن أول من يشارك رأيه.